Budyšin

51.17825
14.4291

buildings

Serbski dom natwarichu 1947–1956 jako narunanje za we wójnje zničeny Serbski dom na Lawskich hrjebjach. 1956 bu swjatočnje wotewrjeny. Hač do dźensnišeho ma wjele serbskich institucijow tu swoje sydło.
Twar nasta 1947-1956 na městnje we wójnje zničeneje Lessingoweje šule jako narunanje za 1945 zničeny Serbski dom na Lawskich hrjebjach. Zakładny kamjeń połožichu 24. awgusta 1947, składnostnje 100lětneho wobstaća Maćicy Serbskeje. Twarske dźěła wukonjachu spočatnje dobrowólne młodźinske brigady. Tež financowanje sta so zdźěla z prócowanjow brigadow a darow.
Wospjetnych problemow pobrachowacych materialow a financow dla twarske dźěła sčasami wotpočowachu, tak zo 1949 zakładny kamjeń druhi raz połožichu. Po zběhance 1954 bu twar w ramiku II. Zjězda Serbow 7./8. julija swjatočnje woswjećeny.
Reprezentatiwny zarjadniski dom bě w běhu časow sydło mnohich serbskich institucijow, mjez nimi (zdźěla hač do dźensnišeho):
- Domowina z.t., třěšny zwjazk serbskich towarstwow,
- Załožba za serbski lud,
- Serbska kulturna informacija,
- rozhłosowe studijo Srjedźnoněmskeho rozhłosa (MDR),
- filmowe studijo Sorabia,
- Towarstwo Cyrila a Metoda z redakciju katolskeho tydźenika Katolski Posoł,
- Serbske šulske towarstwo,
- Maćica Serbska.
Žurla domu so prawidłownje za schadźowanja, wustajeńcy a kulturne zarjadowanja wužiwa.

Malinkowa, Trudla
(12/01/2025)

Stawizny Domowiny, Bautzen 1987, S. 199, 209–211, 245, 250 Měrćin Völkel, K stawiznam třoch Serbskich domow, Serbske Nowiny 16(10.11.2006)218, Předźenak S. 3

Photo 1
Photo 2