Wokrjes Budyšin

51.17953
14.4245

Serbski dom tworješe duchowno-kulturny centrum Serbow. Zaměstnjene běchu tu nakładnistwo, kniharnja, ćišćernja, muzej, banka, kofejownja, wobchody a schadźowarnje mnohich serbskich organizacijow. 1945 bu dom zničeny.
W lěće 1873 kupi serbski nakładnik a rěčespytnik Jan Arnošt Smoler ležownosć. Tu zarjaduje sej hižo 1851 załoženu kniharnju a wotewri 1875 serbsku ćišćernju. Dom dósta mjeno „Maćičny dom“. Dokelž twar žadanjam narodneho kulturneho srjedźišća, kotrež Smoler planowaše, bórze hižo njewotpowědaše, zahajichu zběranske akcije za nowotwar. Srědki pochadźachu přewažnje ze serbskeho wobydlerstwa, wot spěchowarjow w tu- a wukraju a wot sympatizantow w słowjanskich krajach. Z tutych srědkow natwarichu 1897-1904 Serbski dom.
W Serbskim domje bě wulka ličba serbskich institucijow zaměstnjena, mjez nimi serbska knihownja a ćišćernja, serbska biblioteka a knižny skład, Serbski muzej a Serbska ludowa rada, kenclija serbskeho prawiznika a wjacore podružne bydlenja.
Ze zakazom serbskeho zjawneho žiwjenja 1937 buchu wšitke institucije zawrjene. W sćěhowacych lětach měješe Arnošt Simon w přizemju wobchod za tobakowe twórby. Wobchod wosta hač do kónca wójny informelne zetkanišćo a městno k wuměnje powěsćow za serbske wobydlerstwo.
W poslednich wójnskich dnjach 1945 so Serbski dom wupali, pozdźišo bu zwottorhany. Dźěl domu ze žurlu so spočatnje zdźerži a słužeše Němsko-Serbskemu Ludowemu dźiwadłu jako dźěłarnja rekwizitow. W lěće 1990 bu tež tutón dźěl zwottorhany.
Jako narunanje nasta mjez 1947 a 1956 na Budyskim Póštowym naměsće nowy Serbski dom.

Photo 1