51.18601
14.43538

W lěće 1903 natwarjeny šulski dom słuša k najmarkantnišim serbskim kubłanišćam w Budyšinje. Prěnjotnje natwarjeny jako katolski wučerski seminar, běštej tu za čas NDR Serbska wyša šula a Serbski wučerski wustaw zaměstnjenej. Wot lěta 1991 je na tutym městnje Serbski gymnazij.
Šulske twarjenje bu spočatk 20. lětstotka jako domicil za Katolski wučerski wustaw w Budyšinje natwarjene. Połožichu zakładny kamjeń 10. junija 1901, woswjećichu twar 27. jutrownika 1903. W stilu wróćicy lětstotka natwarjeny dom słužeše hač do lěta 1922 wukubłanju katolskich kandidatow za wučerstwo.
Seminar, kotryž bu 1851 w „Klóšterskim domje“ při tachantstwje załoženy, měješe za katolske serbstwo wulki wuznam. Bjezmała cyła katolska serbska inteligenca tehdyšeje doby dósta na tutym městnje swoje wučerske wukubłanje resp. přihotowaše so na studij teologije. Ze wšeho spočatka wotměwachu so tu prawidłownje wučbne zarjadowanja serbšćiny.
Po wobzamknjenju sakskeho knježerstwa so Katolski wučerski wustaw 1922 do Tachantskeje wyšeje šule z nadrjadownjemi přeměni, kotraž w tutej formje hač do lěta 1936 wobstawaše. W slědowacym času zaměstnichu tu cłownu šulu a pozdźišo lacaret. Twarjenje bu na kóncu Druheje swětoweje wójny zdźěla zničene. Tež Tachantska wyša šula bě wažne kubłanišćo za serbskich katolskich młodostnych – do rjadu wuznamnych šulerjow słušataj Wójćech Kóčka (1911–1965) a Alojs Andricki (1914–1943).
Wot 1952 hač do lěta 1959 wužiwa Serbska wyša šula twarjenje jako stejnišćo šule a internata. W lěće 1959 zaćehnje Serbski wučerski wustaw. Hač do lěta 1991 wukubłachu tu něhdźe 4.000 němskich a serbskich wučerjow/wučerkow a pěstowarkow.
Z lěta 1991 je tu kompleks twarjenjow Serbskeho gymnazija, naslědnika Serbskeje rozšerjeneje wyšeje šule, zaměstnjeny. Wot 2008 nadeńdźemy tu tež Serbsku wyšu a zakładnu šulu. W susodnym nowotwarje wobsteji serbski internat.

Photo 1