Budyšyn

51.181
14.42129

pomniki a wopomnjeńske tofle

W Lutherowym lěće 1983 natwarjeny wopomnjenski kamjeń we wuchodnym kuće Budyskeje Michałskeje cyrkwje dopomina na prócowarjow wo rozšěrjenju Božeho słowa w serbskej rěči.
Wopomnjenski kamjeń je stołp ze zornowca, kotryž steji na podesće ze schodami. Horni dźěl ma łahodnje schilene pyramidowe wotzamknjenje. Křiž a napis stej do kamjenja zadypanej a z čornej barbu wumolowanej.
Pomnik postajichu ewangelscy Serbja w Lutherowym lěće 1983 składnostnje 500tych posmjertnych narodnin Martina Luthera. Nastork k tomu a wobsahowe wuhotowanje pochadźatej wot dr. Pětra Malinka. Poswjećenje wotmě so 26. junija 1983 w ramiku 37. Serbskeho ewangelskeho cyrkwinskeho dnja, kotryž woswjećichu 25.6./26.6. 1983 w Budyskej Michałskej wosadźe.
W běhu poswjećenja předčitachu mjena wuznamnych serbskich duchownych, kotrymž je pomnik wěnowany. Zastupjerjo wotpowědnych wosadow połožichu kwětki.
W swojej narěči wuzběhny Jan Malink, zo wěnowanje konfesionelne a regionalne hranicy přesahuje: „Wěnowanje nima geografiske abo konfesionelne wobmjezowanje. Tuž njeje jenož fararjam Michałskeje cyrkwje wěnowany, ale wšěm ewangelskim a katolskim pućrubarjam, hornjoserbskim kaž delnjoserbskim, kotřiž su Serbam Bože słowo sposrědkowali.“

Malinkowa, Trudla
(01.12.2025)

Trudla Malinkowa, Serbski cyrkwinski dźeń 1983 dnja 25./26. junija w Budyšinje w Michałskej cyrkwi, Pomhaj Bóh 33(1983)8 Serbski cyrkwinski dźeń: Prócowarjam wo rozšěrjenje Božeho słowa w serbskej rěči, Pomhaj Bóh 33(1983)10 Manfred Laduš, Pomniki za Martina Luthera we Łužicy: Za spěchowarjow serbskeje rěče, Nowa doba 37(16.7.1983)166, Předźenak S. 3 Foto: Lutherstein vor der Michaeliskirche, Bautzener Kulturschau 33(1983)11, S. 20 Trudla Malinkowa, Serbski pomnik wobnowjeny, Pomhaj Bóh (2007)11, S. 6 Jan Malink, Michałska cyrkej w Budyšinje, Serbska protyka 2009, S. 53–55, S. 54 Trudla Malinkowa, Lutherowy pomnik na Křiču pola Delnjeje Hórki, Serbska protyka 2017, S. 128–131, hier S. 131 Trudla Malinkowa, Sorbische Lutherdenkmäler / Serbske Lutherowe pomniki, in: Jan Malink (Hg.), Fünf Jahrhunderte. Die Sorben und die Reformation / Pjeć lětstokow. Serbja a reformacija, Bautzen 2017, S. 124–133 Trudla Malinkowa, Tafla při farje a pomnik před cyrkwju. Na serbskich slědach po Budyskej Michałskej wosadźe (6), Pomhaj Bóh (2019) 6, S. 10

Foto 1