Žiwe kulturne herbstwo
Ptači kwas
Ptači kwas, kotryž wotměwa so kóžde lěto 25. januara, je popularny nałožk, na kotrymž so wosebje dźěći wobdarjeja. Jako dźak za picowanje w zymje połoža ptački dźěćom wšelake chłóšćenki na talar: z mlokoweho ćěsta pječenu „sroku“ w formje hnězdźaceho ptačka, hnězda a ptački z butroweje kremy abo baiserowe ptački.
Tradicionelnje swjećeše so ptači kwas w Hornjej Łužicy, zwotkelž so nałožk přez kubłarki a wučerki tež do Delnjeje Łužicy rozšěri. Wot 1960tych lět swjeći so ptači kwas w mnohich pěstowarnjach a zakładnych šulach. Dźěći předrasća so jako ptački, ćahnu po wsy a předstajeja małe programy. W serbskich pěstowarnjach noša woni kwasnu drastu swojeho regiona a předstajeja tradicionalnu kwasnu hosćinu.
Kónc 19. lětstotka nasta tradicija wječorneho zarjadowanja za dorosćenych, kotrež moderěrowaše zwjetša braška. Wot srjedź 20. lětstotka wuhotuje Serbski ludowy ansambl programy z měšeńcy estrady z folkloristiskimi elementami a rewije. Tute zarjadowanje předstaja so kóžde lěto na wšelakich městnach Hornjeje a Delnjeje Łužicy, w Delnjej Łužicy pod mjenom „Zapust“. Za dźěći so swójski program Serbskeho ludoweho ansambla poskići.
Je to žiwe kulturne herbstwo, kotrež je dynamiske. To rěka, zo so přez generacije přeco zaso w strukturje abo we wobsahu přeměnja a přiměrja a so takle traděruje a žiwe wostanje.
