Žiwe kulturne herbstwo
Nałožki a swjedźenje
Socialne praktiki, rituale a swjedźenje su prawidłowne aktiwity, kotrež strukturěruja žiwjenje zhromadźenstwow a skupin. Na nich so mnozy wobdźěleja a wone su za nich wažne. Wone su tohodla wuznamne, dokelž identitu tych, kotřiž ju wukonjeja, jako skupinu abo towaršnosć skruća. Njedźiwajcy zjawneho abo priwatneho hajenja – nałožki su wusko z wažnymi podawkami zwjazane.
Socialne, rituelne a swjatočne praktiki přinošuja k tomu, wotběh počasow, podawki w ratarskej protyce abo žiwjenske wotrězki markěrować.
Wone su wusko zwjazane ze swětonahladom zhromadźenstwa, jeho stawiznami a dopomnjenkami.
Wone praktikuja so na mjeńšich zhromadźiznach abo na wjetšich towaršnostnych swjedźenjach a wopomnjenskich swjatočnosćach.
Kóždy wobłuk je sam za sebje wobšěrny, wone so pak tež hustodosć překřižuja.
Towaršnostne změny w zhromadźenstwach wuskutkuja so na socialne praktiki, rituale a swjatočne zarjadowanja, dokelž su wotwisne wot šěrokeho wobdźělenja praktikowacych wosobow a druhich čłonow zhromadźenstwow.
Procesy kaž migracija, indiwidualizacija a druhe sćěhi globalizacije wuskutkuja so na tute praktiki wosebje sylnje.